Beggja skauta byr
Pétur Þ. Óskarsson, framkvæmdastjóri og Hildur Árnadóttir, formaður stjórnar Íslandsstofu.
Liðið ár fer í sögubækur fyrir áhrif kórónuvírussins á heimsbyggðina. Hvern hefði órað fyrir því fyrir 15 mánuðum að áður óþekktur sjúkdómur myndi hafa þau áhrif sem raunin varð? Að tilvera fólks um allan heim myndi hverfast um fjölda smita, veikindi, dauðsföll og stöðu bólusetninga? Hér á Íslandi hefur okkur auðnast að takast á við faraldurinn með aðferðum vísindanna og nú þegar við sjáum til lands megum við vera stolt af því hvernig tekist hefur til. Þetta hefur vakið athygli víða um heim og hefur Ísland verið til umfjöllunar fjölmargra erlendra fjölmiðla vegna þess hvernig til hefur tekist í baráttunni við veiruna. Í könnun sem Íslandsstofa gerði fyrr á árinu kom fram að þegar spurt var um traust til mismunandi landa vegna viðbragða við Covid var Ísland í efsta sæti, sjónarmun fyrir ofan Kanada.
Staða útflutningsgreina á tímum heimsfaraldurs
Útflutningstekjur Íslands drógust saman um tæplega 30% á seinasta ári og er sá samdráttur að langmestu leyti vegna þess að flug og ferðaþjónusta lagðist í hýði stærstan hluta ársins. Það er hins vegar afar ánægjulegt að sjá þá aukningu sem hefur orðið í útflutningstekjum af hugverkaiðnaði en þær námu 158 milljörðum króna í fyrra.
Hér er orðin til ný stoð í gjaldeyristekjum sem gera má ráð fyrir að haldi áfram að vaxa á næstu árum og áratugum. Þá er ánægjulegt að þrátt fyrir kreppu sem fylgdi faraldrinum um allan heim er aukning á útflutningstekjum vegna sjávarafurða. Þetta sýnir okkur hversu mikilvægt það er að fjölga þeim körfum sem við setjum eggin í, fjölbreyttar stoðir útflutningstekna fela í sér áhættudreifingu sem er afar mikilvæg fyrir þjóð sem reiðir sig á útflutning.
Nýr veruleiki í markaðssetningu – saman í sókn
Við upphaf faraldursins var ljóst að áhrifa hans myndi gæta víða og nauðsynlegt væri að mæta því áfalli sem honum fylgdi. Stjórnvöld stigu mjög mikilvægt skref þegar ákveðið var að verja 1.500 milljónum króna til markaðssetningar á Íslandi sem áfangastað. Þeir fjármunir hafa verið nýttir til þess að halda vitund um landið vakandi á okkar helstu mörkuðum. Stærstum hluta þeirra fjármuna hefur þó ekki verið ráðstafað þar sem nauðsynlegt var að hafa svigrúm til viðamikilla aðgerða þegar ferðavilji ykist á okkar helstu mörkuðum. Sem betur fer hillir nú undir þann tíma.
„Stjórnvöld stigu mjög mikilvægt skref þegar ákveðið var að verja 1.500 milljónum króna til markaðssetningar á Íslandi sem áfangastað.“
Fjölbreytt verkefni
Á vettvangi Íslandsstofu var unnið að fjölbreyttum verkefnum á seinasta ári og umfang starfseminnar hefur aukist mikið á undanförnum tveimur árum með nýjum verkefnum. Þar má nefna Heimstorg Íslandsstofu, Icelandic vörumerkið, markaðssetningu á vísindaþorpinu í Vatnsmýrinni, Meet in Reykjavík, Work in Iceland, samstarf við Grænvang, Seafood from Iceland og Saman í sókn. Allt eru þetta spennandi verkefni sem styðja við það hlutverk Íslandsstofu að auka útflutningstekjur og hagvöxt.
Fyrir stafni haf og himininn
Beggja skauta byr er ekki sjálfgefinn og ber að nýta til fulls þegar hann gefst. Við Íslendingar stöndum nú á spennandi tímamótum. Áhrif faraldursins fara hratt dvínandi með tilheyrandi tækifærum fyrir okkar útflutningsgreinar. Okkur hefur auðnast að fjölga stoðunum og við eigum að halda áfram á þeirri braut.
Pétur Þ. Óskarsson, framkvæmdastjóri og Hildur Árnadóttir, formaður stjórnar Íslandsstofu.
